الاثنين، 2 مارس، 2009

عوده للدوام

باجر وراي حلقة نقاش لمدة 3 ايام.. راح يكون مفيد ادري ..

بس في شي ناغزني .. احس انتقالي لقسم الماركتنج مب مناسب بالنسبه لي..

يقولولي احضري عشاء مع ال team في فندق .. ما ادري وايد اتضايقت صح اني ما وافقت ..

بس هل انا ابي اكون مع ناس جذيه .. هالشغل ما يناسبني .. بس ليش ابي اطلع من قسمي .. هل هو الملل ...

في شي ناقصني وادور عليه .. بس احسه مب في هالمكان..

الله يسهل !!

السبت، 28 فبراير، 2009

الساعه 3 الفير.. يالله دخلنا شهر 3 .. الايام تركض ركض مب طبيعي.. وايد اشياء سويناها ووايد اشيا نترياها تيي..

هالسنه احسها مميزه .. بدايتها كانت حلوه لي.. تصالح مع نفسي حبيبتي.. وادراكي انها الاهم..

ممم .. صرت اطلع وايد .. افتر بسبب و بدون سبب.. احب اغير جو,, ابي استمتع بكل لحظه,,

يالله عندي موعد باجر الصبح خلع ضرس الله يعيني ..

---

حبيبتي نفسي.. تصبحين على خير ..

الأربعاء، 25 فبراير، 2009

فضفصة تالي الليل (2)

كما تدين تدان..

قبل كم يوم بالضبط .. دخلت على موظف يديد يا قسمنا و غصب طيب يبي يشتغل شغلي..

وما ادري ليش وايد عصبت عليه .. دخلت مكتبه وكانت السكرتيره عداله .. كلمته باسلوب حاد .. وقلت له "stop" ..

طبعا هو تم ساكت وماقدر يرد .. حسيت عقب اني احرجته بس قلت يستاهل ..

واليوم .. يصير لي نفس الموقف.. اتهزأ من ال HR لاني سألت قسم ثاني عن status موظفه .. يالله تذكرت احساس الشخص الي رمسته بنفس الاسلوب..

انا ما كنت اقصد .. وما كنت ادري انه بيزعلهم ..

كل حد له عذره .. و عقب هاليوم توبه .. ما بهزا احد عالملأ مهما يصير ..

----

ليش نتحرى المتعه في الممنوع .. بس يوم نجربه .. مانستمتع ..

اليوم طلعت لمشوار مع قريباتي .. وماخبرت اهلي.. مشوار بعيد .. بس ما ادري حبيت اعيش التمرد..

ابي اروح مكان بشوري .. برايي .. ابي اسوي الشي انا اباه بدون ما اغضب ربي ولا اهلي.. بس ابيه يكون بقراري..

شغلت السياره و سرنا .. لما قربنا من المول .. دق قلبي .. حسيت بتانيب الضمير.. المشكله مب بفكرة الطلعه .. بعمري ما سقت لاماره ثانيه بدون حد منهم .. حسيت اني غلطت..

بس ليش .. ليش ابسط القرارات مانقدر نتخذها .. ليش كل خطوه لها استئذان و قصه وسبب ..

احبكم .. آسفه .. وصدق ما استمتعت ولا راح اعيدها..


---

ربي.. قربني اليك ... ارحمني .. واهدني ..

الاثنين، 23 فبراير، 2009

فضفة آخر الليل..

يالله .. شكثر صعب علي اتخاذ اي قرار..

دائما الهروب عندي هو الحل لكل مشكله .. ما ادري ليش صرت جذيه ..

ربيعتي تقول اني معقده .. ما تدري انه قرار مصيري مثل هذا صعب صعب اني اقدر اتخذه ..

خصوصا اذا انسان ما تعرفه .. و لا تدري كيف راح يكون معاك.. هل الموضوع بهالبساطه اني اقول هيه و اتوكل على الله .. !

الله يسهل على الجميع ..

دايما اقول اني محظوظه .. غيري تتمنى بعض الفرص الي القاها .. واحس اني انا الي اتدلع و ادور عذر عسب ما اواجه هالموقف..

بس لا مب دلع .. اتمنى اني يوم اوافق على انسان .. اكون من داخلي سعيده.. ابي افرح .. ما ابي اكون متخوفه و متشتته..

---

يا ترى من راح تكون.. و هل بيي هاليوم الي اوافق على انسان و انا مستانسه ببساطه لأني من خاطري اتمناه ولا بس عسب اعيش حالي حال الناس ..

احيانا اقول صدق الحياه سهله على الشباب .. و قرار مثل هذا يتخذونه بكامل قناعتهم .. اما نحن .. يعتبر اصعب قرار ..

ربي أنا مرتاحه لانك تراني .. وتعلم حالي .. وواثقه برحمتك وانك بتكتب لي كل خير..

السبت، 21 فبراير، 2009

دائما.. لي الخيار

وصلني مسج.. نهار الجمعه .. غير نفسيتي و جعلني اتفائل كثيرا..

الحياه بايدي .. وانا محظوظه .. فلازم اختار ان اكون سعيده : )

عوده بعد صلاة المغرب .. وادري اني نورت ال Blogs..

إضافه..

"لماذا تدمن التفكير والله ولي التدبير"
"لماذا القلق من المجهول , وكل شي عند الله معلوم"
اطمإن فأنت في عين الله الحفيظ"
كفالته بلا حدود..
وعطاياه لاتمنه السدود..
فقل بقلبك قبل لسانك..
أفوض امري الى الله..
لا تثقل يومك بهموم غدك .. فقد لا تات هموم غدك فتخسر سرور يومك..

وقررت ان افوض اموري كلها لارحم الراحمين .. وسأسعد بهذا القرار ..


قراراتنا بيدنا.. يا نتحلطم ونضايق عمارنا.. ويا انه نتوكل على الله ونريح قلوبنا..

وانا قررت : ) ..

بلوقي..
الله يعطيني خيرك و يكفيني شرك :p
ومبروك عليك أنا ..